‘सेलिब्रेटी गसिप’ मा माल्भिका र प्रियंका

निरज बाबु भट्ट
असोज ६
                  सेलिब्रेटी हुनुको महत्व जती छ उती नै आफ्नो स्टारडम जोगाउन चुनौती छ सेलिब्रेटीहरुलाई । सञ्चार क्षेत्रको विकास र सामाजिक सञ्जालको बढ्दो लोकप्रियतासँगै नेपाली कलाकारहरुको पनि लोकप्रियता बढ्दै गएको छ । तर बेलाबखत मिडियामा आउने विवादास्पद घटनाहरुले उनीहरुलाई नकारात्मक चार्चाको विषय पनि बनाइदिने गरेको छ । विशेषतः नायिकाहरु विभिन्न समयमा विवादमा आइरहेका हुन्छन् । नम्रता श्रेष्ठ, निशा अधिकारी, प्रियंका कार्की आदि नायिकाहरु यस्ता विवादका उदाहरणहरु हुन् । तर यस्ता विवादास्पद घटनाहरुमा नायिका मात्र दोषी नहुने तर्क गर्छन पूर्व मिस नेपाल माल्भिका सुब्बा र नायिका प्रियंका कार्की ।

              प्रज्ञाभवनमा आयाजित नेपाल लिटेरेचर फेष्टिवलमा संचारकर्मी सवृद्धि राई प्रस्तोता रहेको ‘सेलिब्रेटी गसिप’ शीर्षक दिइएको छलफलमा सहभागि हुँदै पूर्व मिस नेपाल माल्भिका सुब्बाले भनिन् – “यस्ता प्रकरणहरुमा सम्बन्धित व्यक्तिको धारणा नलिई एकोहोरो समाचार मात्र मिडियामा आउने गरेका छन् ।” एकोहोरो समाचार मात्र प्रकाशन÷प्रशारण गर्ने मिडिया राम्रो मिडिया हुन नसक्ने तर्क गर्दै माल्भिकाले सम्बन्धित व्यक्तिको धारणा लिएर मात्र समाचार प्रकाशन/प्रशारण गर्नुपर्ने बताइन् ।
               कार्यक्रममा नायिका प्रियंका कार्कीले केही पत्रकारले अन्तर्वाताको क्रममा सोधीएका प्रश्नको जवाफलाई गलत ढंगले प्रस्तुत गरिदिँदा कलाकारहरुले अनावश्यक तनाबको सामना गर्नुपरेको गुनासो पोखिन् । मिडियाकै कारण विभिन्न समयमा आफुले समस्या भोग्नुपरेता पनि मिडियाबाट टाढा भने रहन नसकिने नायिका कार्कीको भनाई छ । नायिका कार्कीले भनिन्– “हाम्रा लागि मिडियाको भूमिका महत्वपूर्ण रहन्छ । चाहेर नचाहेरै मिडियाको सहयोग आवश्यक पर्छ , त्यसैले मिडियासँग रिस राखेर हुँदैन ।”
छलफलमा सहभागी निलु डोमा शेर्पाले चलचित्रमा नायिकालाई कमजोर भूमिकामा प्रस्तुत गरिने गरिएको तर्क गरिन् । माल्भिका सुब्बासँगै मिलेर नयाँ चलचित्र ‘हाउ फन्नी’ को निर्माण कार्यमा जुटेकी शेर्पाले आजभोली भने त्यो ट्रेण्डमा परिवर्तनको संकेत देखापरेता पनि पर्याप्त नभएको बताईन् ।

राजावादी बनाइयो – माल्भिका
              आफुलाई राजावादी भनेर लगाइएको आरोप नै अहिलेसम्म सामाजिक सञ्जालमा आफुले भोग्नुपरेको सबैभन्दा ठुलो प्रहार भएको माल्भिकाले खुलासा गरिन् । आफुले राजतन्त्र मन पर्छ भनेकै भरमा आफुलाई राजावादीको ट्याग लगाइएको माल्भिकाको तर्क छ । अझ आफुले नेवार केटासँग बिहे गरेपछि त झन् लिम्बुवान विरोधी भई भन्नेसम्मको आरोप लागेको माल्भिकाले बताइन् ।

यो खबर यहाँ पनि - HAMRAKURA.COM